तनहु् । तनहुँको कोटदरवार गाविस–८ ढुङ्गाडेकी अविवाहित २८ वर्षीया बालकुमारी नेपालीलाई आफ्नै नवजात शिशुको हत्या गरेको आरोपमा प्रहरीले पक्राउ गरेको छ । नेपालीले अवैध गर्भधारणबाट जन्मेको पुरुष लिंगको उक्र शिशुलाई सोही दिन हत्या गरी नजिकैको जंगलमा खाल्डो खनी गाडेको जाहेरीको आधारमा प्रहरीले उनलाई पक्राउ गरेको छ ।

सोही ठाउँकी कमला विकले जंगलमा खाल्डो खानी नवजात शिशुलाई पुरेको अवस्था देखेर बालकुमारीले आफ्नै शिशुको हत्या गरेको भन्दै गत भदौ ८ गते जिल्ला प्रहरी कार्यालय तनहुँमा किटानी जाहेरी दिएकी थिइन् । सोही जाहेरीको आधारमा घटनास्थलमा पुगेको प्रहरीले घटनास्थलको अध्ययन पश्चात् अभियुक्त बालकुमारीलाई पक्राउ गरी उनलाई नै शव खाल्डोबाट निकाल्न लगाएको थियो ।

शवको प्रकृति हेर्दा कर्तव्य गरी हत्या गरेको र शव कुहिएर कीरा समेत परिसकेको हुँदा स्थानीय व्यक्तिहरुको रोहवरमा शवलाई सोही स्थानमा अर्को खाल्डो खनी गाडेको प्रहरी निरीक्षकले बताए । अभियुक्त महिलालाई गर्भधारण गराउने व्यक्तिको बारेमा पनि खोजी भइरहेको बताए ।